El theiate erpréseinte ine maison d' carbènie bie t'nue. Ine porte ein l' fond et ine fergnette qui donnent-tè su l' rue. Ine tâpe ein l' coin, deux tois quèyères. Ine quèminée à droite.
Quand on r' laife el rideau, Madelon esst assise au-d'vant dou feu avu s' tiesse ein ses mans et Djaques es pourmène à grands pas tout ein d'visant. - Madelon pousse in gros soupir.

Djaques

Mais pou l'amour dè Dieu, Mad'lon, aréz bie râte finè d' tant souspirei!... Vos vos reindrez malâte
à toudè braire ainsè... Vos poussez des souspirs pu gros qu' des pets d' quevau et les anciens martyrs
n'ait' ni si triss' que vous ein dallant au supplice. Mè, dju n' vos compreinds pus et i faut qu'ça finisse.

Madelon (ein grignant)

Fauroût-è pou vos plair', que d'dansisse avu l' pan de m' quèmiche ein mes deints? I n'a ni d'quoi pourtant!

Djaques

ça s' roût toudè pus gai què d' brair' t'au long dou djoue comme in' Mad'leine et comme vos l' faites.

Madelon

Ouè, dju l'l'avoue, mais brayois-ch' quand no Pierre, ein l' maison, teimpe et tard
cantoût comme in' fauvette!
 

Djaques

Mais s'i s'a fait saudart,

est-c' què nos ein pouvons et faut-è s' fei morie!
Il l'avoût par trop bell', c'est c' qui ll'a eincachie.

Madelon (outrée)

Vos n'astez qu'in sans cuer!
 

Djaques

Dju d'ai pus qu' vo garçon
parc' què s'il eit comm' mè, i s'roût co d'vains l' maison.

Madelon

C'est vous l' causs'...
 

Djaques (moqueu)

C'est mè l' cause!!... Eh bè, ein v'là co n'belle.
N'est-c' nie mè l' cause étou qu'i n' fait nie clair dè belle!
Sacrédié, vos m' fait's rir'.
 

Madelon

Riez tant qu' vos volez.
S' vos avez l' cuer dè rir', mais...
 

Djaques

Mais ein v'la assez,
sacré vingt mill' tonnerres! i faut in' fin à toute,
et v'la co pus d' deux mois que l' maison 'st ein dèroute;
vos savez bi comm' mè, qu' no Pierr', quoiqu' bon garçon,
est partè maugré nous, et sans rim' ni raison
a volu s' fei saudart. A l' fin, faut bie dju l' dise
vos m' fait's tourner mes sangs avu tous vos bêtises.
Dju n' meinch' pus, djun' bois pus, mè v'là pus sec qu'in clau
et si ça continue, dj'ârai des gamp's dè viau.

Madelon

Allez Guigitte, allez! berdèlez t't à vo n'aise.
Et mè qu'es toudè cè comm' su des cautès braises,
dju m' tairai.
 

Djaques

Dieu dè Dieu! ça n'est ni étonnant
on a raison d' dir: téll' mamèr, tel infant.

Madelon (vivemeint)

Què voléz dire?
 

Djaques

Dju dès... dju dès qu' si no pauf' Pierre
est partè maugré nous, c'est qu'il l' tiess' de s'mère.

Madelon (ses deux mans à s' costé)

V'là l' noeud, dist-è l' souïeux!... C'est mè qu'a tous les torts,
c'est mè l' caus' que no Pierre ervaira potiepp' mort!

Djaques

Quiest-c' qui vos pal' dè ça?
 

Madelon

Vous! qui mè l' dèts tout nette.
On crie fort bi no cat, sans crier no minette.

Djaques (raspaisie)

Allons, voyons, Mad'lon, i faut iess' raisonnâpe.
Vos m' fait's, sans vos doutei, in chagrin d' tous les diâpes.
Après treinte ans d' mariâch', ça sârout dou nouviau
si nos nos disputinn' comme agace et carbau
pou dou bon et sans rire.
 

Madelon

Est-c mè qu'a coumeinchie?

Djaques

C'est mè si vos volez, mais d'vonn' nos fei morie
parc' què Pierre est partè?... Ein temps d' révolution
lès djônn's tiess's sont soul'vées, et c'est ça qu' no garçon
a volu s'eingagdgie pou r'vèni caputaine...
Què l' bon Dieu li pardonn' nos chagrins et nos peine!

Madelon

Taisez-vous, v'là Marie
 

Djaques (à part)